Општина Охрид

Димитар Влахов 57

Тел ++389 96 262 469

Факс ++389 96 32 454

Општината Охрид е единица на локална самоуправа, во која граѓаните го остваруваат правото на локална самоуправа непосредно и преку претставници во органите на Општината ( член 1 од Статутот на Општина Охрид).

Од 1945 година наваму територијата на Општина Охрид често е менувана.

До 1990 година владееше еднопартискиот систем на чело со Сојузот на комунстите. Во текот на спомената година се формираа и регистрираа голем број политички партии. По завршените избори во јануари 1991 година се формира првото повеќе партиско Собрание на Општина Охрид. Собранието го сочинуваа 50 одборници и тоа: 15 од ВМРО-ДПМНЕ, 25 од СКМ-ПДП (потоа пререгистрирана како Социјалдемократски сојуз на Македонија), 3 од Партијата за демократски просперитет, и по двајца од МААК, Социјалистичката партија и Сојузот на реформски сили.

Интересите на Општина Охрид во тој мандатен период, во Собранието на Република Македонија, ги застапуваа четворица пратеници- сите од ВМРО-ДПМНЕ.

Вторите Општински избори се одржаа есента 1996 година. Конститутивната седница на Советот на Општина Охрид се одржа во декември истата година. Советот го сочинуваат 23 советници и тоа: 7 од Социјалдемократскиот сојуз на Македонија, исто толку од ВМРО-ДПМНЕ, 5 од Социјалистичката партија и по еден од Работничката партија, Демократската партија на Турците , Социјалдемократската партија на Македонија и Демократска партија.

Интересите на општина Охрид во Собранието на Република Македонија ги застапуваат четворица пратеници сите од Социјалдемократскиот сојуз на Македонија.

Органи на Општината се : Советот на Општината, Градоначалник, Управни и административни органи на Општината и Главен архитект на градот.

Според Статутот Општината врши поголем број работи меѓу кои позначајни се програмите за развој, поттикнување и содавање услови за развој на занаетчиството, туризмот и угостителството. Дава мислење и предлози за развој на установите од областа на културата, спортот, социјалната и детска заштита, предучилишното образование, основната здравствена заштита, заштита на животните и билките, заштита и унапредување на животната средина, го уредува и организира градењето и одржувањето на локалните патишта и улици и други работи поврзани со инфраструктурата (вода за пиење, јавно осветлување, градскиот сообраќај и слично).

Граѓаните на Општината непосредно можат да одлучуваат преку: граѓанска иницијатива, собир на граѓани и референдум.

Советот на Општината е претставнички орган на граѓаните. Советот го сочинуваат 23 претставници на граѓани избрани на општи, непосредни и слободни избори со тајно гласање. Членовите за Советот се избираат за време од 4 години.

Градоначалникот ја претставува и застапува општината. И тој се бира на општи, неспосредни и слободни избори со тајно гласање за период од 4 години.

Граѓаните во општината одлучуваат и за работите од непосредно и секојдневно значење од својот живот и работа преку облици на месна самоуправа.